জৈৱ বৈচিত্ৰ্য

"আকাশ পৰ্যবেক্ষণকাৰীসকল"

       - আল্ফ্ৰেদ নয়েচৰ মহাকাব্যিক গ্ৰন্থ ট্ৰিলজী "দা টৰ্চ বিয়েৰাৰ্ছ"ৰ পৰা অভিযোজিত - অনুবাদ : ত্ৰিনেশ বৰুৱা

কেইবা শ বছৰৰ আগেয়ে এলচিনৰ ওচৰৰ দূৰণিবটীয়া এটি দ্বীপত বাস কৰিছিল টাইকো ব্ৰাহে নামৰ এজন জ্যোতিৰ্বিজ্ঞানী। জীৱনজোৰা সপোন দেখা কামবোৰ কৰিবৰ বাবে তেওঁ এইটো দ্বীপ উপহাৰ স্বৰূপে পাইছিল তেওঁৰ পৰোপকাৰী ৰজাৰ‌পৰা। এই দ্বীপত পচিশ বছৰ ধৰি ৰাতি ৰাতি পৰিশ্ৰম কৰি আকাশলৈ চাই চাই তেওঁ নক্ষত্ৰ সমূহৰ সঠিক অৱস্থানৰ কথা লিপিবদ্ধ কৰি গৈছিল। দুৰ্ভাগ্যবশতঃ, পৰোপকাৰী ৰজাজনৰ মৃত্যু হ'ল। তেওঁৰ বিষয়াসকলে দ্বীপটোলৈ যাত্ৰা কৰিল আৰু তেওঁৰ দুৱাৰত উপস্থিত হ’ল।

বিষয়াবৰ্গই ক'লে, "পচিছ বছৰ ধৰি ৰাজকোষৰ ধন ব্যয় কৰি ৰাতিৰ পাছত ৰাতি একেটা‌ কামকে কৰি একো এটা দেখুওৱাব পৰা‌ নাই।" টাইকোৱে "মইতো আকাশখন পৰ্যবেক্ষণ কৰি আছো" বুলি কৈ তেওঁলোকক তেওঁ প্ৰস্তুত কৰা নক্ষত্ৰ পুঞ্জ সমূহৰ অৱস্থান সূচী দেখুওৱাই দিলে। তাৰে সাতশ নক্ষত্ৰৰ প্ৰতিটোৰে অৱস্থান অতি সুচাৰুৰূপে আৰু যথাযথভাৱে লিপিবদ্ধ কৰা হৈছে। তেওঁলোকে সুধিলে, "অকল এইখিনিয়ে নেকি?" টাইকোৱে কলে, "মই আশা কৰো এয়াই শেষ নহয়, কিয়নো মই ভাবো মোৰ মৃত্যুৰ আগলৈকে এহাজাৰ নক্ষত্ৰৰ বিষয়ে লিপিবদ্ধ কৰি যাব পাৰিম।" বিষয়াসকলে সুধিলে, "এয়া কিহৰ বাবে?" তেওঁলোকে টাইকোক শুধিলে, "ইয়াৰ ব্যৱহাৰ কেনেকৈ কৰে দেখুৱাওক।" এইসকল বুজি নোপোৱা বিধৰ মানুহ। টাইকো ব্ৰাহেই তেওঁলোকক বুজাই ক'লে, "ভৱিষ্যতে আমি গুচি যোৱাৰ বহু বছৰৰ পাছত কোনোবাই কোনোবা এদিনাখন এই ব্ৰহ্মাণ্ডৰ অন্তৰ্নিহিত অৰ্থ বিচাৰি উলিয়াব আৰু মই য'ত শেষ কৰিম তেওঁলোকে তাৰ পৰা আৰম্ভ কৰিব পাৰিব যাৰ বাবে পচিছ বছৰৰ শ্ৰম লাঘৱ হ'ব।".....

কেইবা শ বছৰৰ পাছত জ্যোতিৰ্বিজ্ঞানীসকলে চন্দ্ৰলৈ যোৱাৰ বাটৰ সন্ধান কৰিবলৈ টাইকো ব্ৰাহেৰ নক্ষত্ৰপুঞ্জৰ তালিকাবোৰেই ব্যৱহাৰ কৰিছিল।

সকলো মানুহৰে স্মৃতি থাকে। এই স্মৃতিৰ স্থান কাহিনীৰ অন্ত:স্থলত। এই কাহিনীবোৰ স্পৰ্শনাতীত প্ৰজ্ঞা আৰু ঐতিহ্যবাহী জীৱনৰ সাক্ষ্য বহনকাৰী। কিন্তু এদিন এই কাহিনী আৰু কাহিনীকাৰ সকল নাইকীয়া হ’ব।

নদী প্ৰকল্প হ’ল উত্তৰ-পূব ভাৰতৰ ‘নৈসমূহৰ ৰাইজে ৰচা জীৱন-বৃত্তান্ত’। এই প্ৰকল্পৰে মানুহৰ মুখে মুখে চলি অহা কাহিনী, সংগীত, নাট্যশিল্প, ধ্বনি আদি লিপিবদ্ধ কৰাৰ এক প্ৰচেষ্টা চলোৱা হৈছে। বহু দশক ধৰি আকাশ পৰ্যবেক্ষণ কৰি থকা কাহিনীকাৰ সকল আমাৰ পথ-প্ৰদৰ্শক। টাইকোৰ লেখীয়াই তেওঁলোকো সচা অৰ্থতে আকাশ পৰ্যবেক্ষক। নেপথ্যত থাকি নি:শব্দে কঠোৰ শ্ৰমেৰে তেওঁলোকে তেওঁলোকৰ অতীত, বৰ্তমান আৰু ভৱিষ্যতৰ বহুমূলীয়া ইতিহাস লিপিবদ্ধ কৰাৰ কামত নিজকে নিয়োজিত কৰি ৰাখিছে। আকাশত থকা বিচিত্ৰ নক্ষত্ৰৰাজিৰ দৰেই বিচিত্ৰ ব্যক্তিসকল আমাৰ সহযোগী। 

নৈপৰীয়া সম্প্ৰদায়ৰ শিল্পী, কাহিনীকাৰ, মাছমৰীয়া, নাৱৰীয়া, পশুপালক, খেতিয়ক সকলো একলগ হৈ তেওঁলোকৰ নিজা নিজা কন্ঠত যৌথভাৱে ইতিহাস কোৱাত ভাগ লয়। আমিও এক নতুন পদ্ধতিৰ সহায়ত সেই সমূহ ইতিহাসৰ সমল লিপিবদ্ধ কৰো যাতে অনাগত সময়ত অইন কোনোবাই তেওঁলোকে য'ত শেষ কৰিব তাৰ পৰাই পুনৰ আৰম্ভ কৰিব পাৰে।.....